Балабақшамызда әз-Наурыз мерекесі ерекше сән-салтанатымен, кең ауқымда аталып өтті.

Күннің алғашқы шуағымен бірге есігімізден ұлттық рух есіп, ата-аналарымыз жылы лебізбен қарсы алынды. Бұрымды қыздарымыз домбыраның күмбірін төгіп, көрген жанды тәнті етсе, ақ дастархан басында ұлттық дәм — бауырсақ пен хош иісті наурыз көже ұсынылып, әрбір келген жанға шынайы ықылас пен ізгі ниет көрсетілді.

Наурыз – жаңару мен жақсылықтың бастауы. Осындай игі шаралар арқылы ұлттық құндылықтарымыз дәріптеліп, ұрпақ санасына сіңірілуде.

Баршаңызды Ұлыстың ұлы күнімен құттықтаймыз! Әр шаңыраққа береке мен бірлік тілейміз.